عيـد ميــلاد رأفـــت الصـــاوي

أصدقائي في كل مكان ....

اليوم 07-11-2008 هو عيد الميلاد الـ 34 لصديقنا العزيز علينا كلنا رأفت الصاوي.

رأفت اليومين دوول في أجازة في مصر بس راجع الممكلة السعودية الإسبوع القادم بإذن الله لإستئناف عمله هناك، والحقيقة برغم أني لا أجد الكثير لأكتبه عن رأفت اليوم بسسب ضيق الوقت وقلة الأخبار بس أحب أقول أن رأفت الصاوي حقق هذا العام رقم قياسي جديد بخسارة أكبر مبلغ في حايته البزنسية الحالية في بعض أعماله الخاصة، طبعاً رأفت كده كده كان بيخسر في معظم أعماله، بس الخسارة المرة دي كانت تقيلة حبتين، بكرة تعوض يا أبو رأفت وكما يقول المثل المصري الفاشل وغير المفهوم "اللي يجي في الريش بقشيش"

نتمني لرأفت تحقيق المكاسب المرجوة في عمله الحالي اللي يعوض بيها خسارته الكبيرة هذا العام، وإن كنت بقول لرأفت مش كل المكاسب لزم تبقي فلوس يا حج رأفت، وعسي أن تكرهوا شيئاً وهو خيراً لكم.

المهم أن رأفت الصاوي أكمل الـ 34 سنة فأحب أقول له أنا ومن يعرفه من أصدقائي كل سنة وأنت طيب يا معلم وكل عام وأنت بخير وتعود لنا قريباً بالسلامة.

سميـــــر

رأفت الصاوي وترويض المستحيل

أصدقائي في كل مكان ...

وصلني أمس مساء خبر غير سار لي بالمرة يخص صديقي وصديق معظم قراء هذه الصفحة رأفت الصاوي وهو أخفاقه في المستوي الثاني من الـ CFA بظهور نتائج الإختبارات في بداية الإسبوع الماضي ....

لا أعلم إذا كان رأفت نفسه مستاء من هذا الإخفاق أم لا ولكن الحدث أصابني ببعض الضيق حباً له ولأني لا أحب ولم أعتاد سماع سيئ الأخبار عن زميلنا المجتهد رأفت الصاوي.

وطبعاً لأني عارف أن كتير من أصدقائي غير المختصين وأنا ضمناً ميعرفوش أصلاً أيه هي الـ CFA فأحب أوضح لهم في تبسيط شديد أن الـ CFA شهادة ودرجة عالمية رفيعة المستوي في مجال المال والأعمال تتطلب من ثلاث إلي عشر سنوات من الدراسة أنت وشطرتك وعلشان تبقي الصورة أوضح أن 99% من سكان الكرة الأرضية لا يصلحوا أساساً لدراسة الـ CFA لأنها تتطلب مؤهلات وخبرات سابقة مميزة وأن 99% ممن يقدموا علي دراسة الـ CFA لا يتموها لصعوبتها وأن عدد الحصالين علي الـ CFA في العالم أقل من عدد رواد الفضاء فيه، يبقي أن نذكر للجهلاء بالـ CFA أنها تكلف بعض مئات الألوف بالجنية أو بعض عشرات الألاف بالدولار.

وأحب أقول لـرأفت الصاوي أننا كلنا في إنتظار محاولتك القادمة الموفقة بإذن الله فلا تكتفي من المحاولات وأن لو محتاج حاد يذاكرلك الـ CFA ديه أنا في الخدمة بس متنساش تبقي تدعيلي.

طبعاً غني عن التعريف أن صديقنا رأفت الصاوي هو من أكثرنا إجتهاداً في دراساته العلمية وعمله المهني بإجماع الإئمة السبعة عدا النسائي لتعاطفه مع المرأة وقضية المساوة لكن مش هقولكم هوا إختار مين وهبقي أكتب عنها موضوع منفصل، وفي الحقيقة إجتهاد رأفت في عمله هو دائما مسار إعجاب ونقد وأحياناً تريقة مني ومن معظم أصدقائه المقربين، فدائماً ما يذكرني رأفت بالنملة ليس في ضئالتها وضعفها وإنما في جهدها ومثابرتها فمثالاً تبدأ نملتنا في نقل هرم السكر الذي هو هدفها المنشود في إصرار وعزم ذرة بعد ذرة دون كلل أو يأس والكل يعتقد أنه من المستحيل أن تنهي النملة البسيطة عملها الشاق المضني، ولكن يمضي الوقت ويتضائل الهرم وتقترب قمته من هامة نملتنا ثم تنجزه النملة ومازال النقاش دائر أنه أمر مستحيل، فتحية مني ومنا لصديقنا رأفت الصاوي.

ولا أخفي عنكم أن أحد أهم أسباب أعجابي المتراكم بصديقنا رأفت الصاوي. هي المساعي الدائمة له التي تكون من أسباب توفر الكثير من الوظائف الجيدة وفرص العمل للكثير ممن أعرف أصدقاء ومعارف وحتي بسطاء الناس وأيضاً في تغيير المستوي والدخل لوظائف الكثير من أصدقائه للأعلي والأفضل وهو أمر طيب أحبه في رأفت كثيراً بل وأغار منه أحياناً لجمال الفعل وعظمة الثواب، جازه الله عن سعيه وجهده الخير في حياته وأخرته بإذنه

فأنا بدعي ديما أن يا رب يرزقني من رأفت جلده وأجتهاده ويديله من عندي الـ .... !!! ، مش عارف خايف أديله حاجة من عندي تبوظ الراجل خالص.

المهم في النهاية كل CFA وأنت طيب يا أبو الرووف وتعيش وتاخد CFA غيرها.

ملحوظة بسيطة : أنا كاتب الموضوع ده بقالي خمسة أيام وسبب التأخير أني مكنتش لاقي أي صورة لرأفت لقلة صور الأصدقاء عندي، فأرجو مراسلتي ببعض صور أصدقائنا لتتزين بها الأنترنت (: ...

سميـــر

رأفـــــت الصـــاوي والسيـــف الأنتيــــكة

النهاردة الساعة 3:00 صباحا جالي تليفون غريب من محمد عبد الحميد صديقي العزيز واللي معروف عنه أنه أول من ينام علي وجه الأرض، سابق بكدة الفراخ والكتاكيت وكل الكائنات اللي بتنام بدري،

المهم رديت عليه وأنا هموت من القلق والفضول وسألته : خير يا عبد الحميد.
عبد الحميد قالي : أبداً أنا بس حبيت أقولك أن رأفت زميلنا أتقبض عليه في المطار في قضية بلطجة وأرهاب دولي وقلقلة الأمن العام.

طبعا قمت أنا خابط علي صدري وشاهق وقايل "يا لهوي" كما كانت تفعل ستي الله يرحمها شئنها في ذلك شأن كل الستات المصريات لما يسمعوا خبر مش ولابد. وبعدين أستطردت وسألته رأفت مين يا عبده (اللي هوا عبد الحميد)
فقاللي رأفت الصاوي زميلنا أنت نسيته ولا أيه

فقلت له لاء بس رأفت صحبنا دا راجل محترم وعلي خلق وله مستقبل مهني وكمان بزنس مان وراجل متعلم ومتنور ومش ممكن يكون هوا ده رأفت اللي انت بتتكلم عليه اللي من اكبر مروجي الأرهاب في العالم بعد أسامة بن لادن علي طول واللي متهم في القضية الكبيرة أوي ديه، ولا أيه يا عبد الحميد (اللي هوا عبده).
فقاللي عبد الحميد (اللي هوا عبده) بنبرة غاضبة : يا أخي هوا هوا أنت غبي ليه متفهم بقي، وقفل السكة في وشي

ساعتها أيقنت أن كل الهواجس والأفكار اللي في دماغي ... هي الحقيقة الدامغة التي يقصدها ويؤكدها عبد الحميد

بعد برهة من الزهولة والحيرة بدأت أتصل برأفت علشان أسمع منه أيه أبعاد القضية ؟ وما الأتهام الموجه له ؟ وهياخد كام سنة سجن ؟ ويا تري أعوانه الأرهابيين هيتدخلوا وينقذوه ولا هبيعوه ويجندوا غيره ؟ ويا تري هالحق أخد منه مكينة الحلاقة بالكهربا أحدث موديل مركة براون العالمية ولا لاء وحاجات تانية كتير لا داعي للكلام فيها دلوقتي.

أتصلت بيه وقلتله : رأفت أزيك.
قالي : أزيك يا أحمد، أنا في مشكلة كبيرة قوي
قلتله : أه أنا سمعت عن المشكلة، من عبد الحميد (اللي هوا عبده). ثم أكملت : هي أيه القضية يا رأفت ومتهمينك في أيه ؟
قالي : أحمد أنا أتورطت في عملية كبيرة أوي وجبت سيف أنتيكة من اللي بيتعلق علي الحيطة وأنا جاي من السعودية كنت ناوي أستعمله في ديكور الشقة بتاعتي !!!!!
قلتله : وبعدين !
قالي : بس مفيش بعدين هما (أمن المطار) لقوا السيف الأنتيكة ده في شنط السفر بتعتي فقاموا قلبوا الدنيا ومسكوني واتهموني بكل التهم الي أنت سمعتها من عبد الحميد (اللي هوا عبده).

فطبعا أسبهليت وفكي دلدل شبرين من هول ما سمعت، وسألته يعني يا رأفت أنت ملكشي أي نشاط ارهابي أو علاقة بتنظيم القاعدة.
قالي : يا أحمد مأنت عرفني أنا ماليش في القاعدة والكلام ده وكمان أنا معنديش قاعدة من اساسه.

بيني وبنكم أنا الفار لعب في عبي، لأن رأفت عنده قاعدة كبيرة حبيتين وخصوصا أنه بياكل كتير من ساعة مسافر.

طبعا إستنينا للصبح لأن الوقت كان متأخر شوية. وبعدين عمل رأفت شوية إتصالات رفيعة المستوي بكل الناس اللي يعرفهم واللي ميعرفهمش، لأن رأفت أصلا كثير المعارف والعلاقات وبيتعرف علي أي أنسان تقع عليه عينه ويحاول يعمل معاه بيزنيس كبير أوي (بس طبعا بيخسر في أغلب الحالات اللي أتطلعت أنا عليا) حتي لو كان هذا الشخص لا يجيد في الحياة إلا مهارة المشي.

وطبعا بعد سؤال المساعدة من اللي يسوي واللي ميسواش "لأن مصر ديمقراطية جدا في الحتة دي" استطاع رأفت الذي لا يكل ولا يمل من الوصول إلي كوسة (وسطة) بالحجم المناسب لأن القضية كبيرة زي مانتوا شيفين وقام واضع الكوسة في القضية فذابت القضية عن بكرة أبيها وتحول رأفت المتهم بالبلطجة والأرهاب إلي رأفت بيه في لمح البصر وأنهالت عليه الأعتزارات والأسفات لدرجة أن فيه أسفين أصابوه بكدمات قوية في منطقتي البطن والرأس.

ثم غادر رأفت مطار القاهرة عيناه ترقرقان بالدموع وهو يقبل تراب مصر من حرارة الإستقبال، لأن مصر ديما بتفتح أيديها لأبنائها.


في التقرير القادم سنتكلم عن، هل حصل رأفت علي السيف الأنتيكة ؟ كيف سيتصرف رأفت حيال مهندس الديكور بدون السيف ؟ هل رأفت علي علاقة سرية برجل المستحيل ؟ أشياء كثيرة أخري سنتعرض لها بالوصف والتحليل

سميــــر