بحــــث عـــن

الإصــدارات القـــادمة
"المعبطة" و "علمني العوم والنبي ياحمد" .... سميـــــر

28 October 2008

مـليــــون جنيـــــة

أصدقائي في كل مكان ....

التغيير طبيعة متفاوتة في الإنسان، والتغير سنة كونية منذ الأذل، ولا شئ يبقي علي حاله للأبد، منذ عدة أشهر قليلة مثلاً قرر العالم أن يسقط معجزاته السبع القديمة ويستبدلها بأخري جديدة لأنه ببساطة المعجزات القديمة لم تعد معجزات ... أو هكذا قرروا، واليوم أيضاً نتكلم أنا وأنتم عن معجزة كانت لها سطوة وبريق بين الناس كانت حلم بعيد يراود النفوس، خبي ولم يبقي منه إلا كلمة تتردد علي الألسن.... اليوم نتكلم عن الألف ألف عن عزيزة قوم زلت، نتكلم عن "المليون جنية".





من يجي سبعين تمانين سنة وأحنا بنسمع عن الثروة الطائلة التي يضرب بها المثل في السينما وبين عموم الناس في كلامهم ثروة "المليون جنية"، نسمع مثلاً "أنا لو معيا مليون جنية كنت هأكسر الدنيا ومحدش كان هيقف أودامي"، أو مثلاً "لا يا سعدة البيه الشرف غالي ولو هاتديني مليون جنية"، أو مثلاً "أنا مش ممكن أبيع بنتي أبداً ولا بمليون جنية"، طبعاً كلهم كانوا بيبيعوا في الأخر نتيجة ظروف عجيبة ومعقدة بيحطها مخرج الفيلم وكمان علشان البطلة تضطر تروح لمحمود المليجي اللي معندوش قلب تبكي وتترجاه وهو يشرب شفشق الكونياك الشهير وبعدين يحصل المشهد المهم بتاع ...... مش عارف الكلام بيسرسب مني كده ليه، أو مثلاً يجي سعيد صالح يقول لـ سعاد حسني خلاص عادل إمام دخل السجن وعلشان تصرفي علي الولد ويخش المدرسة لازم تشتغلي رقاصة، فترفض سعاد حسني بشدة وتقولوا دانا لو هأموت من الجوع ولا حتي لو هتديني "مليون جنية" وبعدين في المشهد اللي بعديه بنلاقي الست سعاد زي القمر وهي حزينة في بدلة الرقص الستان المطرزة وبترقص لأمة لا إله إلا الله في حرفية شديدة بتلاتين جنية بس في الليلة لأن الولد هوا اللي جاع مش هي، طبعاً أنا إتبسط جداً أن سعاد منشفتش دمغها في موضوع "المليون جنية" ده وإلا كان الفيلم هيبقي بايخ وممل ومن غير طعم خالص، هنكتفي بالمثلين دوول والأمثلة كتير سواء في السينما أو في الحياة بين الناس .

المهم تمر الأيام والأيام وتصبح "المليون جنية" عجوز كهل لا تقدر علي شيئ ولا ينظر لها الأغنياء بأنتباه، مجرد لفظ مكرر وأثر قديم، فهي مجرد "مليون جنية" راحت ولا جت، يا دوب تمن شقة معقولة أو سيارة رياضية متوسطة أو حتي تمن حفر حمام سباحة وكمان ساعات بتكون قيمة تبرع أو جايزة لإجابة عدة أسئلة تافهة.


"المليون جنية" راحت عليها خلاص وبقت رخيصة، الأنسان كمان بقي رخيص أوي، والأخلاق والمبادئ برده بقت رخيصة أوي.

راحت قيمة وهيبة "المليون جنية" بقيت كلمة "المليون جنية".

سميـــــر

1 comment:

  1. طيب الواحد اليومين دول ممكن يحلم بكام
    زمان كان اخرهم مليون جنية يعنى ليهم اخر
    احنا بقى ربنا اللى اعلم باخرتنا

    ReplyDelete