إستكمالاً للمسيرة ومتابعة أخبار الأصدقاء ...
وصلتنا أمس أخبار من مصدر موثوق فيها جداً "أحمد سيد نفسه" أن أحمد سيد التعلب والشهير بأحمد سيد واللي كلنا بناديله بإسم أحمد سيد زي مثلا أن لو حد عاوزه بيقوم يقول "يا أحمد يا سيد" واللي لسه معرفوش مين هوا أحمد سيد يقدر يتعرف عليه من صورة الموضوع.
المهم أن أحمد سيد جالي أمبارح علشان نتفرج علي المتاش أياه واللي أنا رفضت التعليق عليه إتباعاً لمبادئي السامية وأثناء قعدتنا دار بينا كلام في عموم الأمور ما بين الشغل والحياة إلي أن وصل بينا الكلام أن منحني خطير جدا ... "تاتاتاتــــــا".
الموضوع طلع أن أحمد سيد رجع النحس يلازمه من جديد، ينسي كل شئ ويفسد كل شئ ونظام حياته باظ والشغل ملخبط وأي حاجة يمد أيده فيها بتبوظ وأي موضوع يبدأ السعي فيه مبيكملش وكل شئ ممكن نتخيله في هذا الصدد، يعني ممكن نقول أنه قلب علي شرارة. وأي حاجة يخش فيها بيبوظها وتتقندل علي دماغه.
وفي أخر تطورات الموقف عنده أنه أمبارح ضيع البطاقة الشخصية والبطاقة العائلية وكارنية حضور وإنصاف العمل ورخصة السيارة ورخصة القيادة وشهادة المخالفات وكشوف حساب البنك ونوتة مهمة جدا وحبة فلوس وكارت الـATM وكروت الفيزا والماستر كارد وساعة اليد وشوية حاجات تانية مش فاكر أساميها ولكنه لم يفقد بنطالونه أو الموبيل إلي الأن.
طبعا معروف عن سيد أنه بينسي اي حاجة في خلال ثواني معدودة من حدوثها، بينسي إسمه وعنوان سكنه أحيانا بينسي أنه متجوز وبينسي اسم البنك اللي بيشتغل فيه بينسي هوا رايح فين وجاي منين لدرجة أنه بينسي أنه بينسي.
في النهاية بنحيي كلنا أحمد سيد علي مجهوده في الحياة وبنتمناله انه يتفك النحس ويلاقي الحاجة اللي ضاعت وبنتمني أكترأنه يبطل يسني.
سميـــر
No comments:
Post a Comment